克羅地亞傷疲交煎
萬眾期待嘅世界盃終於嚟到決賽，究竟係法國第二次封王，定係克羅地亞首次捧盃今晚自有分曉。克羅地亞淘汰賽連續3仗踢加時，球員傷疲盡現全靠精神力量支撐住，無論體能、運勢都嚴重透支，捱到最後一刻好易崩潰，樂比睇好以逸待勞嘅「高盧雄雞」法國，簡單捧1.82倍主勝。
（Viu TV99、Now616及618台周日晚11時直播）
嚟到呢一刻，相信好多球迷都期待奇迹發生，若克羅地亞捧盃嘅話絕對係夠晒傳奇及話題性，但客觀事實係，克羅地亞殺入決賽已付出咗唔少代價，場場惡鬥真係身心俱疲，加上身邊會有隻魔鬼話畀佢聽入到決賽已經係了不起嘅成就兼超額完成，面對多一日時間休息、未經歷太大風浪進身決賽嘅法國真係好輸蝕。
格仔兵靠意志頂住
本來對一個職業球員嚟講，15日內踢4場波唔算話好惡啃，但唔好忘記格仔兵團近3場波都要踢足120分鐘，當中仲有2場要以12碼分勝負，令唔少球員都變成十字軍，當中以國米嘅比列錫較嚴重，今仗有機會倦勤，另外右閘禾沙積高、左閘史卓歷、中堅洛夫雲同門將蘇巴錫亦有微傷，雖然克羅地亞戰意高漲精神可嘉，好似中場拿傑迪錫上場發高燒都照踢，不過撐得咁行真係隨時爆煲。
法國今屆表現唔算光芒四射，但卻做到以穩先行，具備奪標嘅條件。分組賽頭兩場小勝穩奪出線資格後，最後一場對丹麥例行公事可回一回氣，淘汰賽對阿根廷、烏拉圭及比利時都唔易應付，但法國都能夠化險為夷，全靠防線穩健，當中門將洛里斯及防守中場尼高路簡迪都應記一功。
法軍後備人腳贏晒
法國兵多將廣，每個位置都有勝任人選之外，後備力量更非常強勁，即使表現唔好亦會有Plan B同Plan C，呢方面克羅地亞係難以媲美，而更重要嘅係法國嘅把握力真係世界級，兩大射手基沙文同基利安麥巴比喺今屆賽事都狀態勇猛，反擊能力超強，即使克軍泊大巴亦有基奧特呢架坦克車開路，所以法國喺人腳上同體力上確實明顯佔優，即使近年世盃決賽明顯旺下盤，連續3屆要踢到加時，樂比亦撐法國90分鐘內解決對手。
