今屆精彩到暈嘅世盃，話咁快就嚟到尾聲，今晚最終王者之戰，由法國硬撼克羅地亞，雖然兩軍於今屆都表現突出，但撇除陰謀論，我仍然相信法國奪冠機會高唱入雲，何解？
首先，我喺世盃開打之前，已經大膽預測法國或巴西，其中一隊會成為今屆王者。依家法國嘅人腳處於當打之年，防線有華拉尼坐鎮、中場有保羅普巴及尼高路簡迪掌控、前線有基沙文及19歲嘅神童基利安麥巴比數胡，呢條中軸線嘅重心球員均屬黃金一代，並且踏入淘汰賽於上線連場硬仗，仍能先後將勁旅阿根廷、烏拉圭及比利時踢出局，明顯經得起考驗。
克羅地亞搏殘難抗衡
相反，處於下線嘅克羅地亞，在淘汰賽面對丹麥、俄羅斯及英格蘭均不算強勁，但呢3仗都要踢足120分鐘，甚至其中2場要靠互射12碼先晉級，贏得咁辛苦，係有韌勁但唔及法國sharp醒。而且連踢3仗加時，體力消耗極大，我哋內行人就睇得出，幾名主力如文迪蘇傑、拿傑迪錫及莫迪歷都係死捱到尾，搏到殘晒，點同「高盧雞」抗衡呀？
我從來都係是就說是，冇把握時唔會講啲模稜兩可嘅嘢，總結一句，若果法國冇發生突然事故，類似1998年決賽前巴西王牌朗拿度生病疑雲再重演，以波論波計，毫無疑問可擊退殘陣應戰嘅克羅地亞，第2度稱霸世盃。
