周三凌晨蘇聯盃激戰連場，阿King有過關心水醒大家，蘇超新軍利雲斯頓由新帥堅尼米拿首戰執掌教鞭，就喺蘇聯盃旗開得勝，不過今仗面對實力不俗嘅咸美頓，未必敢踢得太進取，呢場應該會就住嚟踢，中位數2.5球入球細博得過。
前格拉斯哥流浪前鋒堅尼米拿，新賽季將會面臨職業生涯新挑戰，以主帥兼球員身份帶領新升班嘅利雲斯頓喺蘇超打拚。呢位38歲蘇格蘭前鋒，首次帶隊就以2比1喺蘇聯盃擊敗艾迪爾聯，取得唔錯嘅開局，不過經驗老到嘅佢喺蘇超揾食多年，應該知道咸美頓絕對唔易應付，尤其兩隊過往6次交手，就有5次開2球或以下，呢場戰況應該會一如既往膠着，中位數2.5球入球細係好路。
羅斯郡登地聯做大騷
同時間開波仲有羅斯郡主場對登地聯，兩隊碰頭向來多波入，近9次交手8次開3球或以上，呢場中位數2.5球入球大唔好錯過。最後搭多場歐聯第1圈外圍賽，歷基亞近5歐戰主場4次開2球或以下，今場拎住首回合1比0勝局，返主場面對曲克城實死守，要中位數2.5球入球細。
