邊緣人爭表現必搏命
聽朝國冠盃壓軸戰，由首度亮相嘅「地上最強」巴塞隆拿，喺美國中立場出戰熱刺。巴塞隊長美斯、蘇亞雷斯等大部分世盃國腳都冇隨隊，不過備受爭議嘅新兵馬爾甘菲臘比就有赴美，熱刺同樣陣容不整，但洛蘭迪、盧卡斯莫拉等一眾冇份打世盃嘅邊緣人堅落力，今仗實多波入，捧中位數2.5球嘅入球大更佳。（奇妙電視77台、有線602及662台周日早上11時直播）
巴塞今次美國之旅，除咗德國門將達史特根有隨軍外，未有召入美斯、蘇亞雷斯、碧基、菲臘比古天奴等有份參加世盃嘅國腳，因此會由柏高艾卡沙、沙治羅拔圖及新加盟嘅艾法亞美路等擔大旗，配合一班B隊成員，陣容都幾殘吓。
馬爾甘菲臘比要顯身價
講到巴塞近日最爆嘅新聞，梗係將從已宣布加盟羅馬嘅馬爾甘菲臘比硬撬過檔，呢位巴西翼鋒加盟即赴美會合。講真呢單交易備受爭議，但若果馬爾甘菲臘比有料到嘅話，就可冚晒啲批評聲音，所以佢一定搏盡。
另一邊廂，熱刺同樣有哈利卡尼、迪利阿里、維頓漢、洛里斯等多名世盃國腳未歸隊，個陣都係天殘地缺，不過有基斯甸艾歷臣趕及赴美，配合邊緣人穆沙施素高、拉美拿、洛蘭迪及盧卡斯莫拉。呢班邊緣人都自己知自己事，一定趁今次國冠盃爭取表現，在日前出戰國冠盃便反勝羅馬4比1，洛蘭迪及盧卡斯莫拉更各省兩粒，預計今仗都會繼續搶攻，加上呢支北倫敦球隊近4仗國冠盃，全開3球或以上，捧2.5球大盤更上算。
