英超雖未開鑼，但「雙紅會」已經提早有得睇！今次國際冠軍盃（ICC）其中一個矚目戲碼，當然唔少得曼聯大戰利物浦。其實曼聯4年前戰ICC時，已經嚟過美國密西根球場，當時對手係皇家馬德里，吸引咗接近11萬名觀眾入場，除咗係ICC一項紀錄之外，更創下美國最多球迷入場觀看足球賽嘅紀錄添！嗰場波曼聯以3比1擊敗「銀河艦隊」，4年後舊地重遊，當然想重溫好夢再贏波而回啦！
沙拿撐起利物浦
不過，以兩隊暫時嘅表現嚟講，似乎「紅軍」狀態比較好，雖然ICC首仗輸咗畀多蒙特，但利物浦其餘5場熱身賽4勝1和，加埋入咗15球，上場更反勝曼城，鬥心唔錯。原本以為只係隨隊但唔會落場嘅射手穆罕默德沙拿，上仗亦後備上陣，入替1分鐘即刻建功，依家有佢在陣，前線火力梗係唔使擔心啦！
相反「紅魔」連續3場熱身賽都贏唔到，上場對AC米蘭亦要鬥到互射12碼分勝負，一直糾纏到第13輪先至取勝，依家嘅陣容比起紅軍更加唔完整，真係要睇吓莫連奴有乜嘢調兵遣將板斧喇。
（奇妙電視77台、有線602及662台周日清晨5時直播）
另一邊廂，巴塞隆拿聽朝會同熱刺碰頭，但係美斯、蘇亞雷斯等踢完世盃後都未歸隊，門將達史特根呢場亦會先休息，下場對羅馬先出場，對住啱啱贏完波嘅熱刺，巴塞會唔會招架唔住，一出場就令球迷失望呢？
