尼高高華倒戈搶頭彩
新一季德甲仲有成兩個禮拜至開鑼，不過上屆德國盃冠軍法蘭克福，今晚會喺主場迎戰上屆德甲冠軍拜仁慕尼黑，爭奪第20屆德國超級盃，比賽法定時間90分鐘，若然和波將不設加時，即互射12碼決定獎盃誰屬，拜仁雖然德甲6連霸，近6屆德超盃都有得踢，但只贏咗3屆，上屆仲係靠互射12碼至贏多蒙特，今晚作客全場50,000座位爆滿嘅法蘭克福商業銀行球場，客W熱到1.31倍唔值博，寧捧有2.3倍嘅中位數3.5球大盤。
（Now 671、有線652及612台周一凌晨2時30分直播）
拜仁喺唔夠3個月前嘅德國盃決賽，以1比3輸咗畀法蘭克福，今晚當然有復仇決心，今場焦點係當時帶領法蘭克福捧盃嘅教練尼高高華，已經過檔拜仁，今晚倒戈面對過去兩年幾並肩作戰嘅職球員同球迷，真係百般滋味在心頭，但尼高高華話呢個盃對佢嚟講係極重要嘅頭彩！拜仁多名主力踢完世界盃，雖然只有為法國奪冠嘅哥倫天杜利素肯定缺陣，但幾名主力羅拔利雲度夫斯基、占士洛迪古斯同謝路美保定都狀態未足，不過尼高高華向來喜歡用年輕球員，預期剛外借回收嘅基拿比會擔正掛帥，佢哋啱啱喺熱身賽以20比2大炒業餘球隊羅塔埃格爾恩，落得場嘅球員都想喺新帥面前留低好印象，今晚爭盃場合自然更加肉緊。
法蘭克福留住列比錫執到
法蘭克福由新帥曉達領軍，人腳變動大，德國盃贏拜仁嘅幾位主力包括門將哈迪基、中場奇雲保定、翼鋒馬里奧斯禾夫同中場馬斯卡利他投，但成功留住德盃決賽對拜仁梅開二度嘅當紅射手列比錫，呢位24歲克羅地亞世盃亞軍功臣，暑期曾傳出曼聯、阿仙奴、熱刺、拿玻里甚至拜仁都有興趣斟佢，結果佢啱啱同球會續約到2022年，連佢嘅舊波士尼高高華都話難以置信，衷心恭喜法蘭克福添！法福季前頻密踢熱身賽催谷狀態。睇番兩軍近5次交鋒有4次開出大盤，其中3次總入球更達4球或以上，料今晚會繼續駁火。
