今晚英超早場，萬眾期待嘅利物浦主場迎戰「錘仔幫」韋斯咸。紅軍熱身賽4連勝勁轟14球，狀態弗到漏，加上近年專恰「錘仔幫」，對上3次交手皆至少贏3球，紅軍讓球半、兩球照捧1.84倍上盤。
（Now 621周日晚8時30分直播）
熱身賽4連勝火力充沛
利物浦今季簽入多位高價新兵，早喺7月初已展開季前賽，新加盟嘅法賓奴泰華利斯及拿比基達都唔使應付世盃，可以提早報到，對融入球隊極有幫助。紅軍今季熱身賽只係輸過畀多蒙特，其餘8戰7勝1和，近4仗更接連擊敗曼城、曼聯、拿玻里及拖連奴，加埋入咗14球，無論狀態同火力相當有保證，巴西首席門神艾利臣比加初步演出亦對辦，連「最弱一環」都解決埋，難怪被視為係曼城嘅最強挑戰者。
韋斯咸今季由前曼城主帥比歷連尼接掌帥印，引入多位新兵，包括阿仙奴孖寶韋舒亞及盧卡斯佩雷斯、拉素中場菲臘安達臣及多蒙特翼鋒耶莫蘭高等，質素係有，但變動太多要時間適應，季初抱觀望為宜。何況佢哋近年對紅軍輸多贏少，最近3次交手都起碼淨輸3球，今晚作客晏菲路隨時又被炒鑊甘，上盤讓球半、兩球更係信心之舉，照捧無妨。
