新兵做足準備挑戰霸權
英超開鑼首周即迎來Big 6互片廝殺，由進入「後雲格時代」嘅阿仙奴主場迎戰衞冕嘅曼城。「兵工廠」可以話係Big 6當中備戰最充足嘅一隊，主要原因係新人事新作風，新帥艾美利想更多時間了解球隊，加上陣中主力喺世界盃嘅參與度亦較少，相比起曼城連社區盾都仲未齊腳，樂比認為阿仙奴會有少少優勢，主場受讓半一，1.73倍下盤可秤先。
（Now 621周日晚11時直播）
常言道「創業難守業更難」，「藍月亮」曼城上季以破紀錄100分贏得英超冠軍，領隊哥迪奧拿功不可沒，但「凡事太盡，緣分定必早盡」，曼城要維持呢股「霸王氣勢」唔易，尤其今季陣容變化唔大，主要收購僅得馬列斯，經過世盃洗禮後，球員能否保持飢餓感有待觀察。雖然佢哋喺社區盾以2比0輕取車路士，只係對手防線太多問題，曼城表現唔叫得搶鏡，據稱奇雲迪布尼同史達寧兩位歸隊不足一周嘅球員，今仗均可上陣，但狀態未必最佳。
艾美利花心思鬥老對手哥帥
Big 6之中變化最大就係阿仙奴，新領隊艾美利初次登陸英超，但對哥迪奧拿唔會陌生，因為喺佢執教華倫年代已多次同哥帥交手，即使佢從未贏過哥帥，但其部署甚有心思，而且以兩隊當時人腳嚟講，艾美利錄得4成不敗紀錄已算唔錯，今晚主場唔輸畀曼城絕非難事。阿仙奴季前5場熱身賽獲3勝2和，成績唔曳，最重要係大部分主力都有參與，令艾美利了解到球員嘅特性同狀態，新兵賓特尼奴、柏柏斯達夫普路斯、列治史迪拿、盧卡斯托拉拿及古安杜斯，初步睇都係唔錯嘅補強，尤其係盧卡斯托拉拿呢位烏拉圭防中，正正係阿仙奴最需要嘅鐵血戰士，相信「兵工廠」會有一番新氣象，隨時會有驚喜畀球迷。
