PAOK恃強踢館唔會縮
歐聯外圍賽第3圈次回合，俄超代表莫斯科斯巴達主場鬥希臘球隊PAOK。莫斯科斯巴達首回合作客輸2比3，想晉級今仗非勝不可，不過PAOK上圈主、客兩回合雙殺歐聯常客瑞士巴素利，近3仗歐聯外圍賽全勝兼轟入8球，總入球全開3球或以上，踢法以攻代守，今仗隨時跟主隊再演入球騷，首選中位數2.5球入球大。
（周三凌晨1時30分開賽、馬會網上文字直播）
莫斯科斯巴達上屆以俄超冠軍身份直接進身歐聯32強分組賽，雖然最終未能出線，但講經驗點都好過改制後從未入過分組賽嘅PAOK；斯巴達上仗首回合喺領先2球大好形勢下輸波，不幸中之大幸係攞到2個作客入波，今場只要贏1比0或2比1都可憑作客入球優惠晉級。斯巴達今季俄超踢咗2場主場聯賽都贏對手1比0，所以目前晉級形勢未算太壞。
希臘聯賽未開咧，不過PAOK狀態已經着晒火，除咗上場連追3球反勝斯巴達3比2，第2圈外圍賽更主、客雙殺瑞士球隊巴素利，3場加埋入8球，全開3球或以上，火力十足，何況佢哋上圈都係首回合主場贏波，次回合作客照攻冇死守，今場唔愁冇波入，捧中位數2.5球大盤啱數。
AEK「細」頂些路迪
另一希臘球隊、上季聯賽冠軍AEK雅典在另一場第3圈次回合迎戰蘇超冠軍些路迪。AEK雅典首回合作客和1比1，今場只要唔失波就可晉級，預計會踢得小心奕奕。些路迪今場必需入波先有價講，可惜前鋒主力穆沙迪比利有傷在身，勢對進攻有影響，加上些路迪近年作客出戰歐聯外圍賽作風保守，對上10仗外圍賽或附加賽有8場總入球開2球或以下，今場捧中位數2.5球細盤。
