高圖爾斯錫皇馬隊徽倒戈
今晚喺愛沙尼亞中立場舉行嘅歐洲超級盃，爆發馬德里打吡，由歐聯3連冠嘅「銀河艦隊」皇家馬德里，火併上季歐霸盟主馬德里體育會。皇馬有射手C朗離隊，又有新帥洛佩特吉上任，眾將仍需要時間適應，相反馬體會留住王牌基沙文，成功穩定軍心，而且近年與死敵交鋒都係五五波，仲有得受讓咁筍，讓球客勝咪錯過。
（周四凌晨3時開賽）
馬體會今夏只有右閘維沙積高及老隊長基比離隊，Keep住幾乎所有主力，最重要係成功說服王牌基沙文留隊，起到穩定軍心作用，呢名上季喺各項賽事轟入29球、包括歐霸決賽梅開二度嘅前鋒，仲係今夏法國勇奪世盃嘅功臣，大熟大勇，連同其同胞湯馬士林馬加盟，可謂如虎添翼！而曾效力馬體會嘅比利時門神泰拔高圖爾斯，上周轉投皇馬，仲錫晒隊徽表忠心，要知道冇馬體會當年嘅栽培，高圖爾斯難登上高峰，依家「二五仔」咁樣做，必定激起馬體會球員鬥心。
皇馬C朗施丹離隊有排執
相反，近2屆歐超盃冠軍皇馬，今夏以1億歐元（約8.96億港元）將射手C朗賣畀祖雲達斯，呢位葡萄牙隊長自2009年上「艦」後，9年間為球隊轟入450球，協助皇馬近5年來4奪歐聯冠軍，包括近3年封王，冇咗呢部入球機器，唔通真係靠表現飄忽嘅箭頭賓施馬、傷多過踢嘅加里夫巴利數胡咩？佢哋喺近期熱身賽表現唔錯，但唔係C朗嗰種不斷爭取射門嘅前鋒，緊急關頭未必夠膽孭起呢個重擔。而且功勳主帥施丹急流勇退，眾將對新帥洛佩特吉嘅新戰術體系，都要時間磨合，表現勢必打折扣。何況「床單兵團」近年對住皇馬不落下風，近5次交手取得1勝3和僅1敗堅硬淨，今仗有得受讓，必捧讓球客勝。
