進攻大師鬥出招
英超首周戰果可以話極為正路，Big 6之中除咗阿仙奴曼城互撼，其餘4隊都贏波，可見現今英超愈來愈強弱懸殊，另外世盃後遺症亦冇想像中咁大，畢竟豪門兵多將廣，季初策略大可繼續追捧熱門，尤其係大勇嘅利物浦。至於今晚倫敦打吡大戰車路士主場對阿仙奴，兩位新帥戰術思維都係進攻至上，一於博1.77倍嘅2.5/3球大盤。
（Now 621周日凌晨零時30分直播）
車路士上仗以3比0輕取哈特斯菲爾德，表現唔算亮麗，但總算無驚無險，為領隊沙利取得開門紅。沙利同干地時代車仔最唔同嘅地方，係進攻更主動直接，中場大腦佐真奴費路開始融入車仔體系，加上上仗因遲歸隊退居後備嘅夏薩特，今仗可正選披甲，預計車仔嘅攻力會更加強大。
防線同樣欠穩
不過車仔防線改番4後衞陣式，卻令樂比相當擔心，因為一對中堅大衞雷斯同魯迪格都出名鹵莽，社區盾對曼城就連番犯錯導致落敗，另外一對閘馬高斯阿朗素同艾斯派古達似乎仲適應緊新角色，上仗冇失波只因哈特斯菲爾德攻力欠佳考驗不大，今場對阿仙奴絕對牙煙。
至於進入後雲格時代嘅阿仙奴，上仗以0比2不敵曼城表現令人失望，甚至有人認為比雲格年代更差，新帥艾美利初來英超報到，能否成功可謂言之尚早，但起碼有一點能夠肯定嘅係，佢喺戰術上嘅運用相當大膽，上仗起用奧巴美揚、奧斯爾及米希達利恩三叉(卓戈)進攻效果雖欠理想，但應變亦相當快，換入拿卡錫迪及盧卡斯托拉拿後，效果明顯較佳，相信今場陣容上會作出調整。
阿仙奴同車路士面對同一問題就係防線欠穩，尤其係哥拉辛拿斯及美蘭尼爾斯受傷，令閘位兵源告急，幸好蒙利爾剛傷愈復操，有機會填補左閘空缺，不過整體而言兵工廠防線都係唔見得穩陣，門將施治亦漸多甩漏，今場一於捧大盤啱數。
