今晚西甲首輪有衞冕嘅巴塞隆拿登場，佢哋會喺主場迎戰艾拉維斯。雖然球王美斯今季榮升巴塞隊長，啱啱又宣布暫別阿根廷國家隊，專心為「地上最強」打江山，不過眾將狀態有待提升，何況近年對艾拉維斯甚少大勝，主W又太熱冇肉食，轉捧中位數3.5球嘅入球細更好路。
（Now 632周日凌晨4時15分直播）
上季第25次捧走西甲冠軍嘅巴塞，未開咧先有驚喜，今季開始每支上季盟主嘅波衫都會印上全新金色冠軍臂章，巴塞會成為首支享受呢項榮譽嘅球隊。隨住「小白」恩尼斯達赴日職搵食，球王美斯亦榮升正隊長，而且經歷今夏世盃慘敗痛苦後，佢決定無限期退出阿根廷國家隊，對「地上最強」嚟講絕對係好事，孭起隊長臂章，美斯一定更加落力為巴塞搏殺。
艾拉維斯鐵桶陣死守
不過咁，唔計季前熱身賽，巴塞喺上周西超盃以2比1反勝西維爾，戰情絕非一面倒，唔單止開波冇耐先失波，若非門將達史特根完場前勇救12碼，捧唔捧到盃都好難講，可見一眾主力狀態有待提升，而且新加盟嘅馬爾甘、艾法美路、維達爾及基文迪朗格勒等，仍需要時間適應。
艾拉維斯明顯技不如人，今場一定擺鐵桶陣死守，翻查紀錄，巴塞近7次聯賽對艾拉維斯取得4勝2和1負，只有1次係贏3球或以上，主W太熱冇肉食，讓球主客和要讓到2球，季初始終未弗唔多值博，睇番呢7次交手入面，有6次總入球開3球或以下，轉捧3.5球嘅入球細更為上算。
