周六晚上英超連場激戰，其中熱刺會喺主場同富咸上演「小倫敦打吡」。近幾季熱刺頭號射手「哈神」哈利卡尼一直受「8月魔咒」困擾，聯賽開咧不嬲慢熱，呢場對住前線把握力都唔算標青嘅富咸，雙方都唔似會多波入，中位數3.5球入球細走唔甩。
（Now 621周六晚10時直播）
富咸前場把握力弱
上季攞到聯賽第3嘅熱刺，係今夏唯一一支冇引入新兵嘅英超球隊，領隊普捷天奴對此解釋話：「我認為球隊本身質素已經好好，唔需要喺轉會市場上作無謂嘅收購。」呢番話意味喺冬季轉會市場開啟前，熱刺都要靠番上季原班陣容應戰。不過如果熱刺季初想搶分，就真係唔好旨意哈利卡尼，皆因呢位王牌射手今夏啱啱幫英格蘭喺世盃搏殺完，體能恢復需時，而且佢近4季8月為熱刺喺聯賽出戰都冇波入，要等佢儲夠氣，狀態完全入局都要畀啲耐性，加上另一位得分好手孫興民要離隊踢亞運，呢場唔使預佢，熱刺鋒力將會進一步削弱。
相反闊別英超5個賽季嘅富咸，今夏轉會市場動作幾大，買入占舒利同舒賀爾尼等猛將，不過雖然球員個人能力強，但依然需時磨合，上仗面對水晶宮，佢哋前場把握力不足嘅問題明顯，進攻板斧欠奉，面對實力更強嘅熱刺，富咸前線球員更難有發揮空間，寧願捧中位數3.5球入球細好過。
