喪操做祖記入球機器
今夏有基斯坦奴朗拿度（C朗）強勢加盟嘅祖雲達斯，周日凌晨將會作客基爾禾，正式為意甲新賽季揭開帷幕。C朗每逢為新東家首次喺聯賽出戰，都肯定搶頭威，呢場面對實力麻麻嘅基爾禾，為幫「斑馬兵團」大勝肯定搏盡搶「士哥」，讓球客勝捧得過。
（Now 638周日凌晨零時直播）
意甲近年財力輸蝕，但各支豪強喺今夏轉會市場總共豪使10億歐元（約89億港元），令昔日有「小型世界盃」之稱嘅聯賽強勢復興。其中祖雲達斯由皇家馬德里引入C朗呢項價值1億歐元嘅收購，除咗成為今夏歐洲球壇焦點之外，亦堪稱意甲近年最具話題性嘅一次轉會。
基爾禾近仗交手坐底輸2粒
雖然C朗已經33歲，不過出晒名敬業嘅佢，為保持自己場上狀態日操夜操，上季聯賽加盃賽，呢位葡萄牙前鋒共轟入44球，仲以15球攞到歐聯金靴獎。早前球會內部熱身賽，C朗首次披甲就有波入，幫球隊5比0大勝祖記青年軍，豪不錫身盡顯鬥心。
C朗好勝心極強，過去為舊主士砵亭、曼聯同皇馬首次喺聯賽中亮相，都幫新東家搶得勝仗，其中2次淨勝2球或以上。況且祖記實力喺意甲超晒班，近3次面對基爾禾，都贏對方2球或以上，優勢明顯，呢次仲有入球機器C朗壓陣，基爾禾一班後防難有招架之力，讓球客勝肯定冇走雞。
