歐超盃冇面聯賽唔衰得
皇家馬德里新季登場，周一凌晨喺主場巴拿貝同基達菲上演「小馬德里打吡」。皇馬今季放走C朗拿度過祖雲達斯，上仗歐超盃輸畀同市死敵馬體會，搞到新主帥洛佩特吉冇晒面，今勻返主場兼夾聯賽首騷，唔可以衰多鑊，過往主場對住基達菲佔盡優勢，力爭大捷氹粉絲，讓球主客和讓到兩球照撐2.4倍主勝！
（Now 632周一凌晨4時15分直播）
皇馬今季改朝換代，功勳主帥施丹同王牌C朗拿度相繼離隊，搵嚟西班牙主帥洛佩特吉掌陀。呢位前「狂牛」教頭執教過西班牙國家隊各級梯隊，對本土球員情有獨鍾，因此佢同沙治奧拉莫斯同拿祖費南迪斯為首嘅皇馬「本土幫」，絕對係一拍即合。
喺洛佩特吉領導下，過往一班唔太受重用嘅西班牙兵，好似艾斯高、馬高斯洛蘭迪同丹尼施巴路斯等，喺洛佩特吉帶領下，相信會多番啲機會上位，新門將泰拔高圖爾斯今晚亦有機會處子亮相，喺無後顧之憂下，皇馬可放膽喪攻。
基達菲嚟親巴拿貝例腳軟
基達菲一口氣簽入上季西乙兩大射手沙治哥迪奧拿同謝美馬達，但西乙同西甲級數唔同，幫唔幫到手仲未知，隨時掛住攻畀皇馬有機可乘。況且皇馬近年主場食住對手，近5次喺巴拿貝遇基達菲，有4次贏3球或以上，優勢明顯，今仗為吐烏氣，隨時嚟個大屠殺一振聲威，讓球主勝外，中位數3.5球嘅大盤亦值得支持。
