迪布尼受傷攻力減
今晚英超頭場之一，曼城主場迎戰哈特斯菲爾德。呢場睇落都幾強弱懸殊，衞冕嘅曼城開季堅順，連贏倫敦雙雄車路士同阿仙奴，不過主力奇雲迪布尼突受重傷，對進攻影響甚大，而且哈特斯菲爾德作客強敵必定死守，「藍月亮」隨時小勝算數，主勝太熱冇肉食，轉捧中位數3.5球嘅入球細更划算。
（Now 621周日晚8時30分直播）
曼城延續上季嘅王者風範，先喺社區盾以2比0輕取車路士，再喺上周聯賽首輪作客贈阿仙奴2蛋，贏得都幾輕鬆。不過上周中突然傳來噩耗，中場發電機奇雲迪布尼練習嗰陣右膝韌帶受傷，需要抖3個月，打亂晒主帥哥迪奧拿部署，要知道迪布尼係「藍月亮」嘅組織核心，冇咗佢必令進攻打折扣，另一核心大衞施華又復操冇耐，就算出得都未必夠態。
哈特斯菲爾德死守頂得兩嘴
哈特斯菲爾德喺聯賽首輪慘敗畀車仔0比3，完全係唔夠打，呢類弱隊遇強即屈，今場作客一定擺鐵桶陣，唔望偷雞搶到分，只求唔大敗失少幾粒。睇番兩軍近4次交手，曼城取得2勝2和，認真麻麻，其中有3場開3球或以下，證明哈特斯玩死守頂得兩嘴，加上聯賽連熱身賽在內，曼城近5場只入8球，其中4場開3球或以下，今場好大機會小勝收場，主勝太熱見到都唔開胃，轉捧入球細（3.5球）好過。
