作為一名體育評述員，每當見到一顆新星崛起，都會為之歡喜若狂，始終長江後浪推前浪，一代新人勝舊人。
20年前，當我仍在ESPN講波嗰陣，眼見年紀輕輕嘅奧雲橫空出世，迅速成為利物浦寵兒，兼係英格蘭鋒線新希望，1998年世盃16強對阿根廷嘅妙絕靚波，至今仍為人津津樂道。可惜，奧雲過於倚賴速度，經過無休止嘅傷患折騰後，呢位靠一招走天涯嘅前鋒，最終換來早熟早殘嘅收場。
高速有技術 唔打自私波
20年後，輪到另一位仁兄征服晏菲路嘅球迷，就係「埃及王子」穆罕默德沙拿，相信佢同法國新星基利安麥巴比，係屬於現今球壇嘅滿分攻擊球員。何謂滿分攻擊球員呢？沙拿唔單止速度快，而且技術了得，亦唔會打自私波，鍾意同隊友合作製造殺機，當然唔少得埋門觸覺堅敏銳，雖然呢位埃及國腳已經26歲，但踢法比奧雲全面好多，加上依家有較多保護前鋒嘅球例，預計沙拿嘅足球壽命會比奧雲更長。
利物浦今季前線續以沙拿、羅拔圖法明奴及沙迪奧文尼為首，3人互相走位配合，令對方後衞防不勝防，相信紅軍會成曼市雙雄爭奪英超冠軍嘅最大勁敵，今周作客水晶宮有望贏完再贏。
