王牌續約穩定軍心
今晚英超獨腳戲，由水晶宮於主場火併利物浦。雖然紅軍喺首輪大勝弗到漏油，但水晶宮一向都係豬頭骨，絕對唔易啃，而且啱啱同王牌韋費特沙夏續約，穩定軍心，主場出擊實同你打甩髀，紅軍讓唔起1/1.5球，一於要水晶宮下盤。
（Now 621周二凌晨3時直播）
利物浦防線鬧中堅荒
利物浦喺今季首輪大炒韋斯咸4比0，火力全開。不過紅軍一向最大問題係防守，佢哋在上周放走中堅卡拉雲去卡利亞里，洛夫雲仲有傷在身，而祖爾麥迪比啱啱好番，就算出得都唔夠狀態，預計主帥高普會續用華基爾雲迪積克，帶住客串嘅祖高美斯扼守中路，呢位小將之前打右閘都甩漏多多，轉打中堅仲牙煙。
韋費特沙夏搶分保證
水晶宮係上季英超最神奇球隊，開咧頭7場輸晒兼冇波入，但最終仍能護級成功，中途接手嘅鶴臣功不可沒。雖然呢位老帥教唔掂大隊，但教中型班特別有心得，以往教富咸同西布朗都護到級，何況係陣容更強嘅水晶宮呢。「老鶴」上周收到喜訊，就係首仗贏富咸有士哥嘅王牌韋費特沙夏，同球隊續約至2023年，佢上季聯賽攻入9球，創出自己單季最高入波紀錄，另有統計指出，沙夏上季10次冇正選披甲嘅聯賽，水晶宮全部輸晒，而佢有份擔正嘅29場，場均攞到1.62分，絕對護級大功臣，因此佢決定留隊，的確可以穩定軍心。
水晶宮上季聯賽12次對Big 6球隊，雖然只得1勝1和10負，但有7場係僅輸1粒，包括2鬥利物浦，加上兩軍近11次交手，紅軍錄得6勝1和4負，不過只得2場係贏多過2粒，證明要贏水晶宮都唔會好輕鬆，今仗作客仲要讓1/1.5球咁辣，梗係轉捧下盤。
