費托死晒火 小白現疲態
日皇盃今晚第4圈爆發矚目大戰，鳥棲砂岩主場火併神戶勝利船，亦係兩大「狂牛王朝」功臣、費蘭度托利斯與「小白」恩尼斯達雙雙轉戰東瀛後，首度正面交鋒必成焦點。一向守強攻弱嘅砂岩，自「T9」費托來投後攻力不升反跌，勝利船又過於倚賴「小白」，呢位8號仔勢必成為眾矢之的，前鋒普多斯基又冇態，轉捧入球細更佳。
（周三晚6時開賽）
自2008年至2012年起，西班牙國家隊先後2奪歐國盃及首捧世盃，攻城拔寨嘅費托與喺中場穿針引線嘅恩尼斯達，絕對係呢個「狂牛王朝」建基功臣，如今兩人都三張幾嘢，今夏齊齊遠赴日職搵食，震撼亞洲球壇，今場更係兩人首度喺日本賽場交手，頓成焦點。
砂岩主場近4戰入得2球
今季長期喺聯賽下游徘徊嘅砂岩簽入「T9」，連同本土前鋒金崎夢生加盟，希望加強攻力，可惜佢哋仲未適應球隊打法，令原本守強攻弱嘅砂岩，進攻更加疲弱，特別係主場出擊，近4場僅得2勝1和1負，入得兩粒咁大把，總入球全開2球或以下，「T9」都仲未開齋，打擊信心。
相反，勝利船嘅恩尼斯達適應力更強，早前喺聯賽對磐田山葉及廣島三箭接連入靚波，愈來愈入局，仲搶鏡過傷愈冇耐嘅隊長普多斯基。不過要留意，呢位「8號仔」已經34歲，今夏打完世盃冇耐即赴日報到，近期又經常一周雙賽，漸露疲態，若果佢畀人嘜死，勝利船要撕破守得嘅砂岩防線絕非易事。加上今場係1場過淘汰賽，必定踢得小心翼翼，睇番兩軍近6次交手，有5次開2球或以下，轉捧入球細仲穩陣。
