拜仁勢同賀芬咸駁火
新一季德甲多支球隊大變身應付即將展開嘅賽事，東網直播講波陣容都「變身」，今季有Kannas胡恩晴、「足球字典」Oscar、把口冇時停，扮嘢又搞笑嘅傻仔朗同埋肥龍，四個唔講「波」嘅主持炮製《球愛Live Party》陪你睇波之餘，仲有遊戲玩添！
講番場揭幕戰，德甲6連霸強勢衞冕嘅拜仁慕尼黑，喺新帥尼高高華帶領下，主場迎戰上屆德甲季軍賀芬咸，預期係一場入球騷！拜仁喺德國超級盃大炒上屆德國盃盟主法蘭克福5蛋，顯示呢支德國班霸已經處於上佳狀態，尼高高華嘅戰術亦受到廣泛好評，強力射手羅拔利雲度夫斯基亦聲言打消轉會念頭專心為拜仁搏殺，主場出擊當然希望盡情數胡。
至於賀芬咸喺少帥拿高斯文帶領下演出亦遠勝預期，今季除射手烏夫轉投史浩克外，其餘主力基本上留隊，仲引入咗幾名優質小將，包括外借咗畀維也納迅速兩季，啱啱回收嘅巴西前鋒祖連頓，呢位年輕人喺德國盃連中三元大放異彩，球隊雖然有幾名主力養傷，但拿高斯文向來擅於提拔新秀，而且踢法亦傾向搶攻，今晚有足夠決心同拜仁駁火，兩軍上次碰頭，拜仁喺今年1月嘅德甲主場贏過賀芬咸5比2，今晚再追中位數3.5球嘅大盤啦！
