隊長大日子手足贈興
今晚英超連場好戲，頭場先嚟狼隊主場迎戰曼城。衞冕嘅曼城開季順風順水，主因係佢哋擅於先發制人搶開局，適逢近日係高柏尼加盟曼城10周年紀念，眾將必定搶韁為幫呢位隊長贈興，初段急攻隨時狼過狼隊，1.6倍半場客勝有計！
（Now 621周六晚7時30分直播）
曼城雖有中場發電機奇雲迪布尼重創要抖3個月，但近仗所見未有太大影響，其中上場大炒哈特斯6比1盡顯霸氣，而近3場全部都喺上半場已經領先，由頭贏到尾。
早幾日（8月22日）係曼城隊長高柏尼加盟球隊10周年紀念日，全隊上下都大讚佢係「藍月亮」成功崛起嘅標誌，今場一班手足必定搏甩髀做賀禮。新升班嘅狼隊雷聲大雨點小，頭兩場聯賽只得1和1負，仲要全部都於上半場已經先失波，今仗半場客勝屬穩陣之選。
倫敦打吡 阿仙奴上盤爆「錘」
至於夜少少由阿仙奴喺主場同韋斯咸合演「倫敦打吡」。阿仙奴開咧兩連敗，只因對手係勁旅曼城同車仔，反觀「錘仔幫」韋斯咸首仗慘吞利物浦4蛋，上場領先下又倒輸畀般尼茅夫1比2，後防立立亂，睇嚟新帥比歷連尼仲有排執，就算今仗有韋舒亞倒戈都冇用。再睇兩隊聯賽交鋒往績，阿仙奴近4次贏咗3次，全部都贏多過1粒，讓球盤讓到1/1.5球都冇有怕，捧1.77倍上盤。
（Now 621周六晚10時直播）
