多蒙特執靚陣恰萊比錫

多蒙特執靚陣恰萊比錫
今晚直播德甲重頭戲，多蒙特主場對RB萊比錫，多蒙特今季揼重本組班，打造一支極具朝氣新軍，又搵嚟具級數教頭法夫爾領軍，球隊季前備戰工作亦做得好，今晚聯賽主場第一擊，有力擊退正分心應付歐霸盃嘅萊比錫，多蒙特讓半一撐上盤。

（on.cc東網周一凌晨零時直播）

多蒙特搵嚟早前喺慕遜加柏取得成功嘅教頭法夫爾，放走多名年長或走下坡嘅名將套現，引入咗比利時國腳中場韋素領軍，又成功收購緬恩斯防線支柱艾度迪亞路、雲達不來梅中場靈魂湯馬士迪蘭尼，同法蘭克福飛翼馬里奧斯禾夫等年輕當起嘅新星，更成功留住級數極高嘅美國神童基斯甸普列錫，加上優質本土球星馬高列奧斯、祖利安韋高同麥斯菲臘已恢復健康，球隊質素同兵源都大幅提升。

多蒙特喺法夫爾帶領下，季前備戰安排一絲不苟，除咗喺國冠盃贏過曼城同利物浦，和過賓菲加外，繼後熱身賽對手分別係雷恩、拿玻里同拉素，志在用連場硬仗催谷狀態，對新舊球員磨合幫助甚大。

RB萊比錫上季放走咗教練夏辛侯迪，佢哋已經預訂咗賀芬咸少帥拿高斯文下季加盟執教，今季暫由總監蘭歷克兼任教練工作，佢哋今夏引入咗幾名具級數小將，但現階段恐難彌補中場大將拿比基達轉投利物浦嘅損失，何況萊比錫正忙於應付歐霸盃，佢哋啱啱喺附加賽首回合作客同烏克蘭索爾亞互交白卷，嚟緊周中次回合將決定邊隊可以獲得歐霸盃分組賽資格，呢個資格得失對整季財政預算影響甚大，今晚作客西法倫球場難免會有所顧忌。