未計今輪，英超已進行咗2輪賽事，兩大老牌勁旅曼聯及阿仙奴，開咧表現備受質疑，尤其係紅魔主帥莫連奴，獨沽一味係穩守突擊，冇乜新招，到底「寸王」係咪已經江郎才盡呢？而佢同CEO伍德沃德就買人嘅事分歧太大，對內部有一定影響，而上場作客以2比3不敵白禮頓，「寸王」面臨四面楚歌。
英國傳媒預言，若果曼聯在聖誕節前再輸多4場，莫連奴將會烏紗不保，嚟緊周二凌晨曼聯將會主場硬撼熱刺，又睇吓「寸王」係咪咁命硬？
講到最舉足輕重球隊，非曼城同車路士莫屬，「雙藍」不但成績優異，而且兩軍在教頭哥迪奧拿及沙利帶領下，踢出一種具美感嘅現代化足球，令球迷睇得賞心悅目。
相比起架構日趨完善嘅曼城，車仔無論係內部或人腳方面，仍有好多問號，例如俄籍班主阿布拉莫域乜盃都贏過晒，到底佢仲有冇熱情投入更多金錢支持球隊？從叫停興建新球場一事，無疑令粉絲擔心。
儘管季初沙利嘅戰術令人眼前一亮，但一切言之尚早，強如哥迪奧拿都要喺曼城執教第2季先有收成，可見英超幾難踢，沙利有冇足夠嘅變招應付呢？今晚車仔就會北上造訪紐卡素，「喜鵲」主場出擊例打高一皮波，睇番近5次喺聖占士公園球場對車仔未輸過，隨時成為沙利喺英超嘅首個考驗。
