作客凶地驚到腳軟
今晚英超車路士作客紐卡素，表面上係一場強弱分明賽事，但車仔近年作客聖占士公園都好似撞邪咁，加上領隊賓尼迪斯對車路士及其領隊沙利都相當了解，樂比認為紐卡素今晚有爆冷機會，受讓半一下盤值博，呢架黃金戰車外表豪華卻只不過係奢侈品，想升值都係買「紐」實際得多！
（Now 621周日晚11時直播）
車路士對上一次作客紐卡素贏波已經係2011年，對上5次到訪聖占士錄得1和4負劣績，以一支勁旅對中下游球隊嚟講，表現可謂非常差。其實呢個現象並非呢幾年先有，早喺03至07年期間，紐卡素主場對車仔亦錄得4勝1和佳績，而嗰段時間可謂車仔嘅黃金時期，究竟點解車仔去親聖占士都會突然甩轆，實在好難用常理去解釋。
近5訪聖占士公園未贏過
當然，兩隊今季人腳都有變動，尤其車仔領隊已換上沙利，不過唔可以忽略嘅係紐卡素領隊賓尼迪斯與沙利有淵源，除兩人都教過車仔外，沙利亦係賓帥喺拿玻里嘅接班人，賽前亦互派高帽，以賓尼迪斯向車路士借到羅拔堅尼地嚟睇，相信賓帥對舊球會仲有相當程度了解及聯繫，不過提番堅尼地今場因借用條例唔能夠出場。
其實紐卡素今場最大隱憂唔係來自場內，而係場外球迷對班主艾殊利嘅不滿逐漸升級，近日連番示威行動，已經由球場擴大至艾殊利旗下嘅商店，搞咁多嘢無非係希望逼艾殊利盡快賣盤，不過賓尼迪斯親自出面呼籲球迷喺比賽期間槍頭對外，希望可將影響程度減至最低。
另一邊廂車路士雖然2連勝，不過防線問題依然令人擔心，上仗對阿仙奴失2球再次反映出防線不穩，踢咗咁耐三中堅，一時間踢番四人防線似乎好多球員都唔習慣，尤其係魯迪格及大衞雷斯，呢對中路組合夾咗咁耐都仲係冇乜默契，即使紐卡素攻力唔算強，但憑其突擊及死球戰術，今場足以喺車路士身上偷雞。
