哈利卡尼破咒醒神
周二凌晨英超壓軸大戰，曼聯將會主場硬撼熱刺。曼聯上仗2比3輸畀白禮頓，令主帥莫連奴孭上巨大壓力之餘，紅魔眾將士氣都大受打擊，呢場仲要對住近年表現強勢嘅熱刺，根本唔似有力招架，平手盤捧番熱刺好過。
（Now 621周二凌晨3時直播）
紅魔今季聯賽第二戰，面對實力差幾班嘅白禮頓就吞下首場敗仗，要求出名高嘅魔迷肯定唔收貨，仲將矛頭直指領隊莫連奴。
曼聯將帥不和軍心散
不過「寸王」輸波後一反常態，竟然冇將失利歸咎畀一班球員，仲畀佢哋放咗兩日「特別假」，佢接受記者訪問時就解釋話：「以往你哋班傳媒經常批評我對球員唔好，呢次我唔會再怪佢哋，費事畀你哋話我成日閙班波。」唔知呢次佢改過自新對球隊會有咩影響，不過就似乎想塞住傳媒把口多啲。其實明眼人都知佢同班球員，尤其中場核心保羅普巴，以至於曼聯高層嘅關係，已經開始出現裂痕，嚟緊就算重演當年佢喺車路士最後一季嘅悲劇都唔出奇。
相反聯賽開咧兩連勝嘅熱刺，近年靠住一班年輕球員為骨幹，喺領隊普捷天奴帶領下，成績有目共睹，就算今季轉會市場冇買人，都依然保持到整體實力。尤其哈利卡尼、迪利阿里同捷比亞等幾位英格蘭後起之秀，經歷世盃大賽嘅洗禮之後，已經日漸成熟，前者上仗打破自己聯賽8月入唔到波嘅魔咒就係最佳力證。呢場面對士氣低落嘅紅魔，熱刺絕對有充分實力搶分，平手盤一於捧熱刺。
