從今夏開始，外界就不斷充斥對曼聯唔太睇好嘅消息，由暑假赴美國集訓，因太多球員參與世盃而唔齊腳，影響備戰，跟住出戰季前國冠盃亦表現欠佳，之後英超開咧，頭3場輸咗2場，包括上輪喺主場慘吞熱刺3蛋，輸得堅肉酸，到底紅魔發生乜嘢事呢？
首先，曼聯確實係球星如雲，但好似今夏協助法國勇奪世盃嘅中場保羅普巴，返到紅魔即判若兩人，進退失據，有咁好嘅材料都煮唔出靚菜式，呢位天才橫溢嘅法國國腳已入魔2年，仲未搵到適合嘅陣式，讓佢盡情發揮，主帥莫連奴係責無旁貸。同埋「寸王」任內買來嘅阿歷斯山齊士、盧卡古、艾歷拜利等，轉會費以至人工使咗唔少，不過表現時好時壞，令到高層伍德沃德唔多滿意，成為今夏決定閂水喉、冇滿足「寸王」買中堅嘅主因。
利物浦遇李城穩袋3分
莫連奴買唔到想要嘅人，梗係嬲爆伍德沃德，依家兩人面和心不和，必定影響軍心。儘管伍德沃德話唔會炒「寸王」住，但我相信呢位高層會伺機而動，若果有起色便證明佢用人不疑，倘若嚟緊曼聯繼續冇料到，唔使佢出手，自然有輿論掀起強烈嘅「倒莫潮」，到時就可順理成章掃走呢顆眼中釘。已經黑過墨斗嘅莫連奴，仲啱啱喺歐聯分組賽被抽入H組，要硬撼強敵祖雲達斯同華倫西亞，真係屋漏偏逢連夜雨，睇吓「寸王」有冇咁命硬？相反，另一支紅衣球隊利物浦開季堅順，頭3場聯賽贏晒，今晚頭場作客人才盡失嘅李斯特城，應可穩袋3分。
