洛賓搶韁征史特加捧客客
今晚直播戲碼史特加主場對班霸拜仁慕尼黑，雙方都有強勁數據支持，史特加喺土耳其教練泰亞芬哥古達今年一月接掌教鞭以來，主場出擊7戰4勝3和未輸過，不過拜仁近9次作客史特加都可以贏波而回，今場呢兩個強力數據，點都有一個會被打破，相比之下，史特加今季開得好唔順，德國盃同德甲首度出擊都輸波，而且一球都未入過，狀態未足難以抵禦拜仁急攻，客W熱到冇肉食，黑柴推介1.67倍半全場客客。
（on.cc東網周日凌晨零時30分直播）
拜仁陣中主力球員年紀唔細，不過正值季初體能狀態都處於高峰，經過季前連場硬仗熱身同德超盃磨練，上力程度比其他德甲球隊都要好，尤其上輪未列正選嘅魔翼洛賓，後備入替即展示瘋狂求勝欲望，搶韁到暈，先食詐胡跟住入埋波，帶動拜仁全體隊友走多步，今場佢重返正選陣容，預期又會做急先鋒。拜仁目前爭位情況嚴重，今場後備席上嘅哥倫天杜利素、哥列斯卡、占士洛迪古斯、基拿比同辛度華拿都摩拳擦掌等落場，班正選又點會唔心急喺新帥尼高高華面前爭取表現呢？
史特加過氣國腳未上力
史特加近季做咗過氣國腳集中營，現時陣中包括門將薛拿、守將安達斯碧克、畢斯杜巴、中場隊長根拿、新加盟嘅卡斯特羅、箭頭馬里奧高美斯同後備席上嘅二閘艾奧高，全部都係前德國國腳，但戰鬥力已經走下坡，佢哋喺德國盃首圈強陣以0比2輸畀丙組仔羅斯托克已經好肉酸，聯賽首戰遇護級份子緬恩斯亦輸到無力還擊，現階段明顯未上力，面對如狼似虎嘅拜仁想頂住半場唔失波都幾困難。
