華迪停賽 狐狸劫數難逃
周六晚上英超早場，李斯特城主場硬撼利物浦。「狐狸」過往對親紅軍，都要靠頭號射手占美華迪數胡，可惜呢場「華dee」要坐波監，面對今季攻守兼備嘅利物浦，根本冇本錢搶分，利物浦讓1/1.5球照捧上盤。
（Now 621周六晚7時30分直播）
李斯特城「孖寶」占美華迪同馬列斯一向係球隊嘅進攻命脈，可惜馬列斯季前畀曼城撬走，球會惟有搵踢法相似，兼同樣係阿爾及利亞籍嘅拉治迪基素爾頂檔，雖然呢位中場喺周中英聯盃對英甲費列活特有波入，但對番英超隊嘅表現就有待改善。至於占美華迪原本稱得上係「紅軍剋星」，近5次交手都有波入，不過呢位剛宣布退出英格蘭國家隊嘅前鋒，喺英超第2輪對狼隊時唔生性領紅，今仗繼續要停賽，令李城要旨意年僅21歲、今季尚未開齋嘅伊恩拿祖數胡，聽到都唔開胃。
紅軍3連勝零失波
另一邊廂，利物浦「埃及文明」攻擊組合——穆罕默德沙拿、沙迪奧文尼同羅拔圖法明奴有幾勁，相信唔使多講，至於經常為人詬病嘅防線，新賽季亦得到改善，先重金買入巴西門神艾利臣比加，放走「災難級」門將卡利奧斯，而經過一季磨合，華基爾雲迪積克為首嘅後防線又夾慣夾熟，加上幾位新兵，尤其中場拿比基達表現對辦，令球隊攻防效率大大提升，幫助紅軍開咧3仗聯賽大獲全勝之餘，仲保持零失球，堅到冇朋友。
值得一提嘅係，嚟緊一個星期係國際賽期，之後利物浦就會踏入「魔鬼賽程」，各條戰線都有硬仗要踢，隨時有失分危機，因此呢場對住李斯特城肯定唔會留手搶得就搶，即使要盤口讓到1/1.5球，上盤依然值得支持。
