金牌之爭變人生大戰
雅加達亞運男足今晚上演夢幻決賽，由南韓火併死敵日本。相比之下，南韓今次有包括孫興民、黃義助及趙賢祐在內嘅3位超齡球員孭飛，日本就以U21班底應戰，大人打細路，捧南韓喺呢場「人生之戰」開Ｗ攞金牌！
（有線602及662周六晚7時30分直播）
今次亞運男足最大話題，肯定係南韓能唔能夠攞金牌，帶挈熱刺球星孫興民唔使服兵役，連歐美傳媒都聚焦喺呢個關乎人生嘅重點。由於賽程頻密，南韓大軍周四刻意休操一天，只喺酒店做Gym及游泳，隊長孫興民呼籲隊友：「讓我們去創造新的歷史吧！好好休息後出戰決賽，絕不能輸給對方。」
李昇祐吸引豪門注意
南韓若然如願戰勝日本，不但係史上第5次獲亞運男足金牌，仲係現屬維羅納嘅20歲小將李昇祐，躋身名門嘅踏板。據西班牙《SPORT》報道，大會初期因患重感冒搞到狀態不佳嘅李昇祐，自16強對伊朗打破入球荒後，開始尋回狀態，已經引嚟意甲名門AC米蘭等球會注意。
以U21參戰的日本，因冇超齡球員助陣，最具日職經驗嘅北海道札幌岡薩多中場三好康兒坐冷板，牌面上輸蝕，唔似阻到南韓搶金。不過呢班活力充沛的「生牯仔」，配合及聯防表現不差，尤其戰意旺盛，已有4球斬獲的主力前鋒岩崎悠人，揚言「我再不會讓其他人把我弄哭」，誓要喺國際大賽揚威。
