寸王生死戰 般尼做水泡
經歷26年來最差開局嘅曼聯，今晚將作客鄰市球會般尼，曼聯上仗慘吞熱刺3蛋後，領隊莫連奴已成為下位英超離任領隊大熱，「寸王」由過往萬人景仰變成過街老鼠，記者會上發爛渣片段遭瘋傳恥笑，令今晚對般尼場波變成榮辱之戰，適逢般尼亦正值低潮，如果曼聯今場贏唔到嘅話，莫帥大可執定包袱，就算你係淡友都好，曼聯讓半一都要撐埋今鋪。
（Now 621周日晚11時直播）
究竟莫連奴捱唔捱到今季，老實講樂比真係唔多樂觀，因為曼聯現時嘅老毛病唔係一朝一夕可解決，莫連奴嗰一套證明亦已過時，懷緬過去豐功偉績亦無用，不過客觀地睇，莫帥亦唔係坐以待斃，起碼喺不敵白禮頓之後，佢喺戰術同陣容上都作出調整，而上仗對熱刺單喺進攻方面係有少少進步，弊在多次埋門都把握唔到啫，所以今晚對本季未開齋嘅般尼，值得畀多次機會佢。
睇番曼聯現時最大危機係進攻欠章法，防守亦嚴重不穩，針對防線問題莫帥上場改踢三中堅，並試用安達靴里拉踢後防，因為條防線真係冇乜邊個信得過，呢個現象絕對係好事，起碼知道問題所在，亦肯試吓唔同方案，至於進攻上保羅普巴更專注進攻，而阿歷斯山齊士亦逐漸回復狀態，上場輸畀熱刺可以話技不如人冇嘢好講，今場對實力弱一截嘅般尼，應可憑球員質素取勝。
般尼搏完歐霸腳仔軟
般尼上季意外取得第7名兼歐霸資格，不過呢類細球會要連續兩季取得好成績絕對唔易，畢竟打法已被睇穿，另外資源有限兵源深度亦唔夠，季初兼顧歐霸已搞到兩頭唔到岸，踢咗3場聯賽及6場歐霸都未開齋，唯一慶幸係佢哋歐霸已出局，之後可以專心番本地賽事，但佢哋周四晚先踢完場硬仗，今日又要對曼聯，相比起抖咗咁多日嘅紅魔當然輸蝕。
莫連奴亦冇輕視般尼，上周四晚特登到般尼觀戰吼路，又入場睇曼聯U23賽事，睇吓有冇咩後生仔幫到手，工夫可以話做到足，相信莫帥今場可贏波繼續吊住鹽水先。
