史浩克今仗有兩名新加盟猛將登場，加上近3次對哈化全勝兼保持不失，史浩克讓半一捧上盤。
（on.cc東網周一凌晨零時直播）
史浩克上輪作客禾夫斯堡，全失3分真係頂住道氣，佢哋全場形勢不落下風，但就畀球證同VAR打亂晒部署，事緣佢哋後防大將拿斯達錫喺下半場20分鐘一次犯規，球證原本出示咗黃牌，點知轉頭VAR跟進要球證再睇，拿斯達錫最終由黃變紅，最過份係兩分鐘後輪到禾夫斯堡前鋒韋格賀斯報復犯規，球證畀咗紅牌，呢個時候VAR又發功，球證再睇重播後將紅牌變番黃牌，一來一回令史浩克踢少個，但其實兩個犯規都極有爭議性，最終史浩克踢到補時4分鐘失守輸埋，十分失運。
德國世盃腳魯迪首度登場
史浩克出師不利，但少帥泰迪斯高仍然保持樂觀，佢話今場係球隊等咗超過3個月嘅首仗德甲主場比賽，全體球員都熱切期待以好表現答謝球迷，佢哋喺轉會窗關閉前增添猛將，喺拜仁簽入德國世盃國腳中場施巴斯坦魯迪，佢今仗會同由里爾來投嘅左閘咸沙文迪爾雙雙首度登場，戰鬥力肯定有所提升，泰迪斯高話佢哋季前備戰做咗好多工夫，今仗只要發揮出應有水準，好有信心可以贏番一場。
哈化柏林整體實力稍遜史浩克，佢哋上輪主場面對新升班嘅紐倫堡，全場都佔唔到優勢，只靠射手伊比斯域一箭定江山，加上門將查斯甸屢救險球至僥倖小勝，球隊狀態未足，加上傷兵滿營，今晚作客史浩克球場自然睇低一線。
