首都球會哈化柏林季初已經鬧兵荒，可能佢哋唔興拜神，聯賽只係踢咗一輪已經傷兵滿營，今晚陣中竟然有8名一隊成員因傷缺陣，戰鬥力難免減弱。
哈化陣中除咗捷克中場達列達、澳洲國腳翼鋒馬菲歷基同斯洛伐克守將比卡歷係長期養傷外，近兩季曾經入選德國國家隊嘅左閘柏頓赫特，因為近期拉傷腹股溝要休息，中場小將薛尼費迪亦傷咗足踝，兩名副選門將莊拿芬奇連士文同謝斯碧克，亦分別因為生智慧齒同十字韌帶撕裂要缺陣，加上啱啱重創後歸隊嘅射手戴菲沙爾基暫時只能單獨操練，呢8位戰將今晚都唔會到訪史浩克。
此外，今夏由薩爾斯堡加盟嘅奧地利國腳華倫天奴拉沙洛，上輪初登場即貢獻助攻，點知到咗比賽末段被撞傷，為安全計未有出席賽前練習，今晚有可能要紮住上陣，不過教練戴達好識得苦中作樂，佢話哈化已經係不幸中之大幸，皆因聯賽首戰贏咗壓力冇咁大，而且踢埋今場之後，佢哋就有兩星期國際賽休戰期，相信到再下輪聯賽時，球隊陣容就會冇咁殘咯。
