馬格德堡頂得兩嘴
由於嚟緊踏入國際賽期，好多聯賽質晒喺剛啱個周六及周日打埋，搞到今晚賽事特別少，但正所謂貴精不貴多，阿King一樣搵到好嘢益大家，最有心水係德乙獨腳戲，基爾主場迎戰馬格德堡，上季攻力強橫嘅基爾，今季突然啞晒火，撞正玩死守的馬格德堡，初段勢必拉鋸，半場和好路。
(周二凌晨2時30分開賽)
基爾上季表現突出，尤其係進攻非常凌厲，全季合共轟入71粒，冠絕德乙，並取得第3名，可惜喺附加賽不敵禾夫斯堡，功虧一簣未能升上德甲，最弊係陣中首席射手、有18球進帳嘅杜基斯治，喺今夏亦轉投剛升上德甲嘅杜塞爾多夫，影響甚大。除咗喺聯賽首輪大勝堅唔掂嘅漢堡3比0之外，之後2場聯賽僅入1粒，咁啱得咁蹺，3場全部開半場和，證明基爾初段面對有氣有力嘅敵軍，明顯老鼠拉龜冇碇埋手。
另一邊廂，今季先升上德乙嘅馬格德堡，頭3場聯賽只得2和1負，入得2粒咁大把，完全未夠班，連同曼費特卡華禾、祖爾漢拿、拿比獲迪等主力因傷倦勤，今場作客一定玩死守，無獨有偶，馬格德堡呢3場全部都開半場和，睇嚟守得兩嘴，半場和值得再追。
羅連安特弗爆「格」殺勿論
次關方面，有法乙嘅羅連安特對格勒諾布爾，羅軍開季後聯賽連盃賽近6戰5勝1和，弗到漏油，相反格勒諾布爾近3場只得1和2負，加上前鋒比域圖受傷未必出得，今場作客凶多吉少，羅連安特讓半一照捧上盤。
尾關阿甲，紐維爾舊生主場硬撼圖庫曼體育會，圖軍近期要分心自由盃，上周中才造訪厄瓜多爾球隊國民體育會，仲要輸0比1兼未回氣，而且紐維爾舊生近3次主場對圖軍全勝之餘，全部都喺上半場取得領先優勢，非常搶韁，進取啲不妨揀半場主勝。
