箭頭未回氣 往績輸蝕
今晚日本聯賽盃進行8強首回合，其中大阪飛腳主場硬撼橫濱水手。飛腳有「日聯盃殺手」黃義助啱啱做完亞運金牌英雄，今場未必趕及披甲，而且近年交鋒水手略佔上風，今次仲有得受讓咁筍，必捧讓球客勝。
（有線661及601台周三晚6時直播）
老牌球隊飛腳喺今屆日聯盃戰績唔錯，連埋分組賽在內取得5勝3負，其實有賴於陣中「日聯盃殺手」黃義助，佢喺今屆有5球進帳，包括上圈附加賽獨建四功，兩回合以4比2淘汰磐田山葉。不過呢位南韓前鋒剛於上周末先喺亞運為「太極虎」擊敗日本奪金，佢仲以9球成為賽事神射手，非常醒神，但佢喺亞運決賽搏到加時先贏，攰到爆今場未必可趕及上陣，連同另一位於今屆日聯盃入咗6粒嘅長澤駿又轉投神戶勝利船，加上喺聯賽衰到排尾2，依家飛腳首要目標係護級，未必有心喺盃賽發圍，就算有地利都信唔過。
另一邊廂，水手喺今屆日聯盃8仗中，取得4勝3和僅1敗，演出平穩，包括在上圈附加賽，兩回合計以5比3踢走有普多斯基、恩尼斯達助陣嘅神戶勝利船，令人喜出望外。翻查紀錄，水手同飛腳近10次交手，水手取得3勝6和僅1敗，絕對唔赦飛腳，今場仲有得受讓，讓球客勝咪錯過。
鹿角分心亞冠 益咗川崎
同時間有另一場矚目8強戰，鹿島鹿角先喺主場迎戰川崎前鋒。鹿角近期要兼顧亞冠盃，搞到疲於奔命，上周中喺亞冠盃8強首回合贏天津QJ兩粒，轉頭喺日前聯賽反輸畀廣島三箭1比3，無論係體力定心態上都較輸蝕。依家鹿角成副心機擺晒喺亞冠盃，仲有韋法臣李安度同森谷賢太郎等主力養傷，實在難擋近7場贏5仗嘅川崎前鋒來襲，何況近3次對碰客軍贏晒，就算有前鋒主力小林悠入選日本國家隊缺陣此役亦冇有怕，平手盤值得秤先。
（有線662及602台周三晚6時直播）
