今晚歐國聯B1組首輪賽事，捷克主場火併烏克蘭。捷克仍處於青黃不接階段，但對住歐洲球隊每每好「大」喜「攻」；烏克蘭喺「軍刀」舒夫真高執教下崇尚進攻，2.4倍大盤值博。
（有線618台周五凌晨2時45分直播）
捷克自「黃金一代」尾期嘅路斯基及施治退出國家隊後，至今都未有具級數球員接班，中場孖寶安東連巴拿克與積及贊圖，只係效力意甲中型班烏甸尼斯及森多利亞，好彩前鋒卡文錫突然彈出，為捷克15次披甲入咗7粒，鋒力尚可，不過中場核心達列達因傷未有入選，冇咗佢瞻前顧後，對防線影響不小。
「軍刀」注入進攻元素
烏克蘭兩年前搵嚟舒夫真高接手，「軍刀」貴為一代射手，注入更多進攻元素，近5場就勁轟9球。捷克近5次對歐洲球隊，有4次開3球或以上，鬥攻格局一於捧入球大。
