迎接歐國聯之前，葡萄牙主場先約戰世盃亞軍克羅地亞，不過大家就睇唔到世界足球先生候選人大戰喇，因為葡軍王牌C朗並未入伍；「格仔兵團」克羅地亞雖有世盃金球獎及歐聯最佳球員莫迪歷壓陣，但文迪蘇傑退出國家隊，攻力同樣受損，兩軍教頭相信試陣為主，1.91倍半場和值得捧場。
（有線603及604台周五凌晨2時45分直播）
今輪國際賽係「後世界盃」首輪賽事，各隊經過世盃洗禮後重整旗鼓，領隊都會重新部署。由於葡萄牙下周先踢由熱身賽升格咗嘅歐國聯，而克軍則會對西班牙，今仗競爭性冇咁大，未必會打真軍。
文迪蘇傑退役 克軍削鋒力
葡萄牙隊長C朗為求盡快適應意甲新環境，主帥費蘭度山度士今次體恤佢未有召其入伍，反而重召連拿度辛捷士，前面就靠曼城貝拿度施華及西維爾安達施華做波，中後場相對有威廉卡維奴、比比及門將魯爾柏迪斯奧等老將，防守上頂得住。克羅地亞雖有隊長莫迪歷壓陣，但門將蘇巴錫及前鋒文迪蘇傑已退出國家隊，冇咗文迪蘇傑，即使仲有拿傑迪錫、波索域及比列錫呢條「黃金中場」，鋒力始終有影響，雙方半場摸索機會高，半和啱數。
