今晚開始係國際賽期，但巴甲就一於少理繼續開快車。其中山度士主場對甘美奧，甘美奧有幾個主力要踢太公波，今仗料會用副選應戰，反觀山度士正值聯賽3連勝，寧捧當頭起揀主W。
（周五早上6時開賽）
今仗雖然話喺中立場帕卡恩布球場踢，但位置距離山度士嘅大本營只有90分鐘車程，之前佢哋亦經常喺呢度擺陣，所以話係「半個主場」都唔過分。曾經跌到落第18位嘅山度士，喺上月中盃賽贏咗高士路之後，信心返晒嚟，喺巴甲取得3連勝，其中鋒將加比爾巴保沙上輪大演帽子戲法，以3比0大破華斯高，氣勢勁到冇朋友，今仗仲有另一主力古斯達禾漢歷基坐完波監復出，人腳更見充裕。
反觀，客隊甘美奧上輪以「夫添」主場搞掂保地花高，可惜受嚟緊嘅國際賽影響，今仗前鋒艾華頓索拉斯及中堅華特簡尼紐文定獲召缺陣，另外後衞哥迪斯巴布沙又要停賽，加上佢哋作客勝率得4成，今仗恐難全身而退。
富明尼斯難讓維多利亞
講多兩場巴甲波，富明尼斯主場對維多利亞，主隊中場蘇盧沙黃牌「夠數」停賽，前鋒柏度古靴美亦有傷缺陣，加上往績又唔靚仔，近6次交手贏得2次，讓唔起維多利亞，「讓客」可取。最後阿美利加明尼路主場鬥華斯高，後者易帥後未見起色，作客環境料更加惡踢，阿美利加明尼路有望乘勢反彈，博主W。
