落難日耳曼 翻身需時
首屆歐洲國家聯賽周五凌晨打到嚟，當中最矚目肯定係最高級別A1組嘅重頭戲，由德國主場迎戰新科世盃盟主法國！法國今次幾乎沿用世盃大軍嘅原班陣容出戰，實力同默契俱備；相反經歷「世盃災難」嘅「日耳曼軍團」，士氣及信心都需時重建，冇咁快可以爬番起身，寧買當頭起，「高盧雄雞」受讓平半，強捧1.75倍下盤！
（有線602及662台周五凌晨2時45分直播）
法國喺今屆世盃成功封王，由分組賽到決賽表現可以話係非常穩定，稱得上實至名歸，連一班優質邊緣兵皮耶、拿卡錫迪及拉比奧特都搶唔到國家隊席位，可見人腳之鼎盛。法國今次點兵，只得門將洛里斯因傷缺陣，大部分世盃功臣均有入選，除門將哥斯迪、中堅阿爾拉米、中場馬度迪同前鋒基奧特幾位年過30，其餘大部分主力都處於當打嘅黃金時期，經過世盃洗禮後，一班新星包括基利安麥巴比、班捷文派華特等都變得更加成熟，因此呢次點兵，領隊迪甘斯搵原陣應戰，絕對合情合理。
相反2014年世盃冠軍德國隊，慘中世盃衞冕魔咒，小組就黯然出局，畀外界批評為「食老本」嘅固有踢法成失敗主因，事後仲爆出中場大將奧斯爾疑受種族歧視風波，黯然退出國家隊，另一中場基迪拉亦被棄用，迫使主帥勒夫喺陣容同踢法作出改動。首次入選嘅利華古遜中場夏維斯、賀芬咸守將尼高舒侯斯同重返國家隊嘅利萊辛尼，係就係有番啲新鮮感，不過要等佢哋夾熟依然需要時間，整體實力難同當旺嘅法國相鬥。
近3次對決德國未贏過
翻查往績，德國近3次面對法國都冇着數，僅取得1和2負，今仗料難抵擋法國一眾高質鋒將猛攻，法國下盤屬好路之選。
