心繫亞冠 有所保留
今晚日聯盃上演4場8強次回合賽事，重頭戲川崎前鋒喺東京味之素中立場硬撼鹿島鹿角。首回合各一言和，但鹿角成副心機放喺亞冠盃，難免有保留，加上川崎前鋒近年交鋒食住鹿角，讓平半捧1.85倍上盤。
（有線662及602台周日晚6時直播）
兩隊首回合打和1比1，川崎前鋒現時排聯賽第2位，但同榜首廣島三箭有啲距離，嚟緊重心相信放喺盃賽度。鹿角聯賽僅列中游冇嘢好爭，反而喺亞冠盃就愈戰愈勇，早前8強首回合輕取中超勁旅天津QJ兩粒，9月18日呢個敏感日子，就要應付次回合。同亞冠盃相比，日聯盃嘅重要性明顯較低，多線作戰下難免要作出取捨。此外鹿角仲有韋法臣李安度、安部裕葵及伊東幸敏等傷兵倦勤，殘陣下更加靠唔住。
主隊川崎雖有王牌射手小林悠等3人獲日本國家隊徵召，今場無緣披甲，但呢支上屆日聯盃亞軍，仍有中場老將中村憲剛擔大旗，配合齋藤學及知念慶等好手，後者喺首回合就攻入扳平士哥，火力仍有保證。加上川崎近4次鬥鹿島，獲3勝1和佳績，其中2場更贏夠3粒，擺明格食格，讓平半上盤不容錯過。
水手追打乏力飛腳
同時間另一場次回合直播戲碼，橫濱水手主場再鬥大阪飛腳。首回合水手作客4比0重創飛腳，令人驚喜，相反飛腳依家喺聯賽位居尾2，加上首回合落後太多，隨時疊埋心水喺聯賽護級好過，加上射手黃義助現時為南韓踢緊「太公波」，想追亦有心冇力，水手追打落水狗，1.72倍主勝好路。
（有線661及601台周日晚6時直播）
