聽朝重量級熱身賽，由美國喺主場硬撼巴西。美國正處於重建階段，新人偏多明顯欠缺經驗，相反「森巴兵團」早前與主帥迪迪續約，穩定軍心，而且王牌尼馬開季後頻有士哥，佢又係「花旗國剋星」，加上近日交鋒又食住美國，巴西讓1/1.5球，上盤好路。
（周六早上7時30分開賽、馬會網上文字直播）
美國小將頂檔經驗輸蝕
今夏無緣世盃決賽周的美國，王牌丹普西近日更宣布掛靴，重組無可避免。單睇今次25人嘅大名單，竟然有多達17人嘅出賽次數唔過10次，包括聖日耳門名宿韋亞囝囝添莫菲韋亞，反而多蒙特快翼基斯甸普列錫冇份，經驗嚴重不足。
雖然巴西喺今夏世盃8強止步，不過主帥迪迪着重攻守平衡，有助球隊持續進步，因此獲得續約至2022年，可帶隊衝擊下屆世盃，穩定軍心。至於巴西王牌尼馬，自法甲開季後4場聯賽入咗4粒，腳風轉順。翻查紀錄，兩軍近6次交手，巴西唔單止錄得全勝，其中5次至少贏2粒，尼馬更係「花旗國剋星」，自2010年入選巴西後，3次對美國入咗4球，今場有力大炒美國，上盤咪錯過。
