周六凌晨熱身賽，蘇格蘭主場硬撼比利時。比利時今夏喺世盃勇奪季軍，尤其以維頓漢、韋素、夏薩特同盧卡古等為首嘅「黃金一代」大熟大勇，面對實力一般嘅蘇格蘭贏兩粒話咁易，讓球客勝捧得過。
（有線603及604台周六凌晨2時45分直播）
沉睡多時嘅「歐洲紅魔」喺世盃大踢爭氣波，仲首次打入三甲，靠嘅除咗天時地利，「人和」可以話係最重要元素，皆因比利時近年有一批猛將湧現，前線有盧卡古衝鋒陷陣，中場又有夏薩特等進攻天才組織攻勢，連後防都有維頓漢同「鋼門」泰拔高圖爾斯坐鎮，雖然今仗費蘭尼、賓迪基同米洛列特有傷退隊，但以佢哋「歐洲明星隊」咁滯嘅陣容，實力唔會嚴重走樣。況且，下周二佢哋就會出戰歐國聯A級第2組嘅賽事，作客新興勢力冰島，今仗正好畀呢班球星寓賽於操，迎接呢場硬仗。
蘇格蘭用二線兵未夠班
相反蘇格蘭除咗新任隊長嘅利物浦後衞安德魯羅拔臣，同今季喺曼聯鮮有機會上陣嘅麥湯米尼之外，隊中大部分球員都只喺踢蘇超同英格蘭低組別聯賽，整體競爭力根本冇得同比利時鬥，尤其呢班波近3次對陣「歐洲紅魔」全部輸晒，往績慘淡，呢仗火併強敵估計都凶多吉少，讓球客勝值博。
