藉歐國聯省招牌
歐國聯A級第3組首輪分組賽，意大利主場迎戰波蘭。意大利無緣俄羅斯世盃後全面改革，今屆歐國聯正好作為重新省靚招牌嘅好機會；波蘭踢法主攻，前鋒殺手羅拔利雲度夫斯基喺世盃雖然冇貨賣，不過近期喺拜仁賽事已重拾射門鞋，波蘭近期鬥歐洲球隊例必多波入，波童捧2.5球入球大。
（有線662及602台、奇妙電視77台周六凌晨2時45分直播）
意大利緣盡俄羅斯世盃決賽周後，起用前曼城主帥文仙尼執教，文仙尼上任後踢咗3場熱身賽，分別贏沙特阿拉伯、輸畀法國同打和荷蘭，成績不過不失，不過最令人欣慰係球隊連續3場都有入波，包括獲重召嘅「巴神」巴洛迪利喺對沙特嘅比賽都有入波，有望改善前任教頭雲度拿執教時鋒力不足嘅問題。
「羅拔仔」回勇有力駁火
波蘭喺俄羅斯世盃分組賽出局，喺外圍賽入波仲多過C朗嘅羅拔利雲度夫斯基更加食白果，表現令人失望，不過這名國家隊史上入球王今季開咧後狀態回勇，代表拜仁喺德甲及德盃連續上陣3場有士哥，回歸國家隊有力重振雄風。
由於同組對手葡萄牙今次冇選王牌球星基斯坦奴朗拿度入伍，戰鬥力大減，預計兩軍為爭出線首戰必拚盡求3分，特別係缺席世盃嘅意大利更加需要喺主場球迷面前打場翻身仗，既然波蘭對上7次鬥歐洲球隊都開3球或以上，今場捧大最啱數。
