首騷贏唔到文帥嬲爆
今晚歐國聯A3組爆發大戰，由葡萄牙火併意大利。葡萄牙喺今次國際賽期畀王牌C朗掛免戰牌，無疑令火力大減，意大利上輪大意失分，型佬主帥文仙尼嬲到爆，佢一向要面梗係唔衰得，難得葡軍冇C朗必趁機搵着數，讓球客勝咪錯過。
（有線662及602台周二凌晨2時45分直播）
葡國C朗免役鋒無力
由於葡萄牙王牌C朗今季轉投祖雲達斯後，喺聯賽都仲未開齋，佢希望盡快適應新環境，因此葡軍特准呢位大佬喺今次國際賽期免役。不過葡萄牙冇咗C朗，可以靠邊個數胡呢？老實講句，無論係安達施華、謝臣馬田斯都唔多靠得住，上周「拍跳」克羅地亞打和1比1，要勞動到老將中堅比比入波，可見冇C朗嘅葡軍鋒線幾曳。
意大利近7對賽僅1敗
另一邊廂，無緣今夏世盃嘅勁旅意大利，依家改由型佬主帥文仙尼執教，呢位前國米及曼城嘅冠軍級領隊，近年轉教加拉塔沙雷或辛尼特都唔多如意，今次不惜減人工，一來希望帶領低迷嘅祖國走出谷底，二來都想證明自己係有料到，但日前喺歐國聯A3組首輪賽事初次領軍，幾經辛苦先逼和波蘭1比1，激到文帥紮紮跳，仲批評球員從後場推進時犯錯甚多。佢份人最要「飛士」，雖然「契仔」巴洛迪利有啲傷，未知趕唔趕得切上陣，但撞正對面冇C朗，仲唔趁火打劫咩。加上近7次交手，意大利只係輸過1次咁大把，受讓必捧讓球客勝。
