歐國聯A2組賽事冰島主場迎戰「歐洲紅魔」比利時，冰島8場不勝，相反「歐洲紅魔」比利時以夏薩特為首的攻擊線，火力全開，挾今夏勇奪世盃季軍餘威，繼大勝蘇格蘭後可炒多一場，捧讓球客勝。
（有線601及661台周三凌晨2時45分直播）
比利時世界盃雖然奪得季軍，但球隊上下仍然未算滿意，由熱身賽升格為首屆歐國聯，正好畀機會佢哋贏一個國際賽冠軍，所以佢哋每場都會認真打。先講番A2組形勢，冰島上仗0比6大敗畀瑞士，比利時要贏得首名入4強再踢附加賽爭冠軍，隨時最後要同瑞士計得失球，所以今場佢哋都想喺冰島身上攞多啲入波。
事實上，擁有隊長夏薩特、盧卡古、梅頓斯等「黃金一代」嘅比利時，日前國際賽造訪蘇格蘭，在盧卡古先開紀錄下，主將夏薩特亦有入波兼交出2次助攻，連後備入替的巴舒亞伊都梅開二度，最終大勝4比0，盡顯強橫攻力。連同此役在內，「歐洲紅魔」近10場豪取9勝1負，氣勢如虹。
冰島下滑近8戰不勝
冰島連續殺入2016年歐國盃及今夏世盃決賽周，主帥賀基姆臣功不可沒，但這名「牙醫教頭」已掛冠而去，難免有所影響。事實上冰島今年戰績已下滑，不但世盃3戰僅得1和2負，於分組賽出局，連同之前的國際賽，近8場只得2和6負，而且王牌基菲爾施古臣今季在愛華頓備受冷落，只曾在盃賽披甲，狀態明顯未達最佳水平，上仗更被瑞士蹂躪，信心全失，今場輸少當贏。
