周三凌晨國際熱身賽，英格蘭主場迎戰瑞士。「三獅兵團」上場歐國聯鬥西班牙先勝後敗，今場要打爭氣波。瑞士剛於歐國聯大破冰島士氣高昂，不過踢熱身賽係另一回事，而且瑞士近6次喺國際賽鬥英軍輸足5次，有格食格味道，今場一於博英格蘭反彈開主W。
（有線603及604台周三凌晨3時直播）
英格蘭上場歐國聯主場鬥西班牙喺先入1球之下反輸1比2，不過英軍其實都有唔少追和機會，整體表現唔算失禮。英格蘭喺主場熱身賽表現特別醒神，對上一次熱身賽主場輸波已經係16年3月輸畀荷蘭1比2，之後9場5勝4和，4次和波對手分別係西班牙、德國、巴西及意大利4支傳統勁旅，面對實力稍遜嘅二線球隊好似土耳其、尼日利亞都順利贏波，水準靠得住。
近6次交手贏5次
瑞士上場歐國聯6比0大炒冰島，不過瑞士應付熱身賽態度唔算積極，近7次同歐洲球隊拍跳只得3勝1和3負，上場搏得咁盡，今次隨時畀主力休息，而且瑞士近年喺國際賽對英軍都冇啖好食，對上6次交手輸5次，其中4次仲輸2球或以上，今場寧信主場出擊嘅英格蘭。
