新帥轉踢法Vs老將要回氣
今夜歐洲國家聯賽A4組重頭戲，「狂牛」西班牙主場硬撼「格仔兵團」克羅地亞。「狂牛」在恩尼斯達等多名元老退役後，新帥安歷基明顯唔太like傳控戰術，但改變打法磨合需時，而應屆世盃亞軍克羅地亞，又老將偏多，預計會留前鬥後，加上近年雙方碰頭，初段例歎慢板，半場和乃不二之選。
（有線662及602台周三凌晨2時45分直播）
西班牙喺今夏世盃16強出局，之後搵咗前巴塞隆拿教頭安歷基接手，但同時有3大元老恩尼斯達、大衞施華及碧基宣布退出國家隊，3人均屬連奪兩屆歐國盃及2010年世盃嘅功臣，亦係tiki taka傳控足球嘅代表人物，冇咗佢哋好難延續呢種打法。而且安帥唔太like傳控戰術，執教巴塞嗰陣經常打反擊。日前「拍跳」反勝英格蘭2比1，明顯加咗好多前場壓迫元素，並且起用沙奧尼古斯、洛迪高摩連奴、馬高阿辛斯奧等新仔，前場變動都幾大，需要時間適應。
克羅地亞世盃搏得太盡
克羅地亞喺今夏世盃奪得亞軍，令人驚喜，不過門將蘇巴錫及箭頭文迪蘇傑都決定功成身退，尤其係後者退役，另一前鋒卡拉馬歷今次亦未有入選，令前線少咗一把具威脅嘅尖刀。儘管仍有隊長莫迪歷、拿傑迪錫等大將領軍，但佢哋都三張幾嘢，而且喺世盃嗰陣搏得好盡，早前返番各自嘅球會都表現麻麻，為免過於消耗體力，預計達歷會採用控球在腳嘅打法，喺初段刻意拖慢節奏，睇準機會先發力。加上兩軍近5次交手，有4次開半場和，值得追多鋪。
