今晚東網直播德甲賽事，RB萊比錫主場迎戰漢諾威，萊比錫牌面佔上風，不過佢哋開季頭兩場開得曳，至今未嘗一勝，好在兼任教練嘅總監蘭歷克有個國際賽休戰期畀佢作出調整，陣中多名帶傷同準備未足嘅國腳，近期操練亦開始上力，有望喺主場打開今季德甲勝利之門，不過對手漢諾威今季表現十分硬淨，頭兩輪遇強都能夠力保不敗，幾位後防球員質素紀律兼備，萊比錫要贏都好難大炒，推介有3.65倍好分頭嘅讓球和。
（on.cc東網周六晚9時30分直播）
萊比錫首輪作客以1比4慘敗畀多蒙特，上輪返主場遇上升班球隊杜塞爾多夫都只係和波收場，歐霸盃附加賽主場遇弱旅索爾亞，都踢到補時至驚險晉級，球隊攻守表現都未達水準。萊比錫正處於教練交接嘅真空期，上季執教成績唔錯嘅夏辛侯迪掛冠而去，而未來新帥拿高斯文又協議咗喺賀芬咸教埋今季至過檔，萊比錫呢段時間要搵升咗總監嘅蘭歷克兼任教職，好在呢個國際賽休戰期嚟得合時，近期佢哋操練積極，連歸隊較遲嘅德國國腳箭頭迪姆華拿，同瑞典國腳科斯貝治都開始上力，今晚有決心喺主場球迷面前敲響勝鼓。
博3.65倍讓球和
漢諾威今季季初賽程不利硬仗連場，不過佢哋卻憑住防線嘅優異表現力保不敗，首輪作客摸和雲達不來梅已經見到防線組織嚴密，上輪喺主場頂住多蒙特強攻更見防線級數，重心華迪馬安頓係今季至今獲《踢球者》網站評分最高嘅德甲中堅，配合同樣硬淨嘅奇雲雲馬同奧利華蘇治，就算遇上勁旅都唔易大敗，估計萊比錫只能小勝，冷敲讓球和。
