賓施馬大聖爺掌控開火權
今晚西甲壓軸戲碼，畢爾包主場硬撼皇家馬德里。雖然皇馬有C朗離隊，但反而畀賓施馬同加里夫巴利「升呢」過吓大佬癮，配合主帥洛佩特吉推動傳控踢法，頻頻入波，聯賽3連勝弗到漏，近況麻麻嘅「巴斯克雄獅」畢爾包就算有主場都難頂，直取讓球客勝。
（Now 632周日凌晨2時45分直播）
皇馬以往有C朗做大佬，賓施馬同加里夫巴利惟有充當下把位，球隊任何機會都第一時間製造畀C朗數胡，其中「賓佬」成日都踢唔足全場，而加里夫巴利就不時受傷連正選都危危乎。但隨住C朗今夏轉投祖雲達斯後，佢兩位老哥即「升呢」做大佬，可以踢得獨食啲就即刻大爆發，其中賓施馬近2場聯賽入4粒，要知道佢上季聯賽只係入得5球咁大把，依家唔使就住嚟踢梗要發威啦！「大聖爺」加里夫巴利仲醒，連續3場聯賽都有士哥，啱啱仲當選8月份皇馬最佳球員添，證明冇咗已經3張幾嘅C朗，對「銀河艦隊」唔係壞事。
皇馬3連勝至少贏2粒
而且新帥洛佩特吉刻意加強球隊嘅傳控踢法，令皇馬進攻更加流暢悅目，啱晒賓施馬同加里夫巴利去數胡。唔好忘記，佢哋仲有弗到爆嘅新仔馬高阿辛斯奧，佢日前為西班牙喺歐洲國家聯賽對住世盃亞軍克羅地亞，交出2個入波加3次助攻，協助「狂牛」大炒6比0，有埋馬高阿辛斯奧助陣，皇馬唔愁入唔到波。
雖然畢爾包喺聯賽都未輸過，但前鋒老將阿度里斯有傷在身，今仗肯定唔出得，令「巴斯克雄獅」攻力大減，何況皇馬唔單止頭3場聯賽贏晒，而且場場都至少贏2粒，今場有力大勝而回，直取2.3倍讓球客勝。
