周日淩晨英超大戰，屈福特會喺主場出擊迎戰曼聯。「大黃蜂」屈福特開咧4戰全勝攞晒彩，新帥查維加西亞明顯有啲計仔，呢場面對表現飄忽嘅「紅魔」曼聯，雖然實力差啲但有狀態搭夠，主場有力搶分，屈福特受讓半一，下盤唔好錯過。
（Now 621周日淩晨零時30分直播）
屈福特絕對係今季英超開咧最令人意外嘅奇兵，連同聯賽及英格蘭聯賽盃第2圈，「大黃蜂」已經豪取5連勝，當中每場最少入2粒，國際賽檔期前更喺主場反勝強敵熱刺2比1，表現夠晒說服力。新帥查維加西亞聯賽4場波都堅持用同一班正選球員，班波夾得多，默契自然有保證，可見呢位西班牙領隊對球隊充滿信心。
車仔唔冒進追半和
相反曼聯領隊莫連奴開咗咧幾場，都好似未諗掂心水陣容，球隊演出難令人放心之餘，呢場仲有左閘勞基梳爾上陣成疑，加上前鋒拉舒福特坐波監缺陣，戰力大打折扣，呢場隨時再有閃失，敲下盤好過。
較早開波嘅，仲有車路士主場面對卡迪夫城。車仔喺領隊沙利帶領下大踢控球戰術，講求穩打穩紮，唔會一味急於進攻，過去3場波都同對手半場打和。加上新升班嘅卡迪夫城表現逐步改善，上仗面對勁敵阿仙奴，都成功喺半場逼和對手，呢場再遇倫敦強敵，相信依然有力守住半場，半場和捧得過。
（Now 623周六晚10時直播）
