踏入今個周末，本港即將迎來超強颱風，我奉勸各位讀者除咗要做好充足嘅防風措施之外，最佳嘅節目，就梗係留喺屋企等睇好波喇，因為今晚英超連場大戰，熱刺、利物浦、曼城、阿仙奴同車路士悉數登場，喺大風大浪前夕，能夠安坐家中睇波，由食晚飯睇到食宵夜，既安全又開心。
頭場熱刺唔赦利物浦
頭場已經勁到爆，由熱刺主場硬撼利物浦，亦係兩大新派主帥普捷天奴同高普嘅正面交鋒。雖然論實力及號召力，熱刺都比「1哥」利物浦略遜一籌，但普帥擅於作出針對性部署，制訂適合戰術彌補實力上嘅不足，而且兩軍都係打高強度壓迫嗰家波，路數差唔多，要視乎臨場發揮，但我相信熱刺有力一戰。
紐卡素阿仙奴和味濃
至於「雙藍」曼城同車路士，今季都未輸過，其中車仔仲4戰全勝，佢哋今晚齊齊主場出擊，迎戰同為新升班嘅富咸及卡迪夫城，贏波冇難度。反而阿仙奴作客紐卡素就有暗湧，畢竟阿仙奴新帥艾美利仲未執掂隊波，尤其係防線錯漏百出，造訪一向主場難打嘅紐卡素，絕對係硬仗，睇番「喜鵲」上次喺主場，逼到車仔出盡真功夫先至險勝2比1，所以我覺得今場「和」味濃。
